ခက်လိုက်တေ

အို............
ခက်လိုက်တေ
မချိလို့သွားကြဲရယ်လို့ထင်။

အို............
ခက်လိုက်တေ
ရည်းစားမဟိလို့မိုင်နီစွာ အီးချမ်းရေထင်။

အို................
ခက်လိုက်တေ
အားမဟိလို့ဂုတ်ငုံ့ခံနီစွာ အရေလို့ထင်။

အို................
ခက်လိုက်တေ
ဖေ့သာမဟိလို့ထီးမထိုးစွာ ကံမယုံလို့ထင်။

အို..............
ခက်လိုက်တေ
ဥာဏ်မမှီလို့စာမရွီးစွာ ပျင်းပိုင်ထင်။

အို...............
ခက်လိုက်တေ
ပြောစရာဟိလို့ဝင်ပြောစွာ စကားများပိုင်ထင်

အို..........
ခက်လိုက်တေ
လုပ်စားစရာမဟိလို့ပြည်ပလားစွာ ပြည်မချစ်ပိုင်ထင်။

အို...........
ခက်လိုက်တေ
ကိုယ့်ဝမ်းမနိုင်လို့ သူများကိုမပီးနိုင်စွာ ကပ်စီးနည်းပိုင်ထင်။

အို.............
ခက်လိုက်တေ
ပညာမတက်လို့အမှားပြောမိစွာ မိုက်ရိုင်းစွာပိုင်ထင်။

အို..........
ခက်လိုက်တေ
မာန်ပါလို့သွားခြဲ ရယ်ပြထင်။

အို..........
ခက်လိုက်တေ
မပြောဘဲမနီနိုင်လို့ပြောပလိုက်မယ် ပစ အကျင့် ဝမ်းအကျင့်ရာ။

အို.............
ခက်လိုက်တေ.....၁၀၀၀၀၀၀၀၀၀၀၀၀၀၀၀၀၀၀၀၀၀၀၀၀၀၀၀၀၀၀၀.........
Share

ရခိုင်သား

ရခိုင်သား
ကလားမနိုင်ဂေလေ့
ချင်းနန့်ပြိုင်ဂေ အောက်ကဟိယင်း။

ရခိုင်းသား
အတ္တကြီးဂေလေ့
ဗမာနန့်ပြိုင်ဂေ ကျွန်ဖြစ်နိန်ယင်း။

ရခိုင်သား
အမျိုးချစ်ဂေလေ့
မျိုးခြားတွိဂေ ချစ်ကြိုက်ယင်း။

ရခိုင်သား
သတ္တိဟိဂေလေ့
ရန်သူတိကို ဖားနီရယင်း။

ရခိုင်သား
အမျိုးမြတ်ဂေလေ့
သောက်စားတိနန့် ဆိုးဂတ်ယင်း။
အို....
ရခိုင်သား
တွေးဗျာလ် တွေးဗျာလ် ရင်လီးရေ
ဂုသတ်မယ် ဂုခွက်မယ်
လီသေနတ်တိပစ်ဂတ်တေ
ရခိုင်သားလေ ရင်လီးရေ။

အို......
ရခိုင်သား ရခိုင်သား
ငါလေ့ ရခိုင်သား.....

သဇင်

ခွာညို ဇီဇဝါ ပိတောက်ကြာ
ရာသီးမျိုးစုံ ပန်းမျိုးစုံနန့်
ဝီဖြာလန်ဆန်း သန္တာပန်းပါ။
ပြောလို့မကုန် ပန်းမျိုးစုံဟိကေလေ့
ဆောင်းတုံးလို့နွီအရောက်မာ
ပွင်းဂတ်တေ
ပင်မြင့်ကိုခငိ ပန်းသဇင်ဂါး
အမြတ်ဆုံး။

လှိုင်း

လှိုင်းဖြိုလို့
ကျောက်တောင်မပြို
လူတိငါ့ကို
ဇာလောက်ဆိုလည်း
ထိုထိုဝီးကွာ
ယူဇနာကို
ကျော်ကာဖြတ်လို့
ငါလားဖြိုဖို့။

လှိုင်းဇာလောက်ဖျက်
ငါမပျက်
တွက်မှက်ကျောက်ဆောင်
မှတ်ပင်မှတ်လည်း
တရက်ရက်မာ
သင်ပျက်စီရဖို့
အဆက်မပြတ်
ငါလှုပ်ခတ်နီယင်း။
.....
ယင်းစွာ
ငါ့လုံးလ ငါ့မာန
......လှိုင်း......

အယင်လိုလို့ သံကြိုးရိုက်စွာ

အခင်ကြီးစိန်မောင်တယောက် အဝီးရောက်သားပါးက စာလာရေအတွက်တာနန့် အားရပရ စာအိပ်ကိုဖွင့်ပလိုက်ရေခါ၊ စာထဲမာပါလာရေအကြောင်းက ""တပြည်တရွာ(ရန်ကုန်)မာဝမ်းစာရေးအတွက် သားချေအလုပ်ထွက်ရှာနိန်ဂေလည်း အဆင်မပြေစွာတိက တိုးလာဗျလ် ဖနပ် တောင်ကကောာင်းဝယ်မစီးနိုင်ပါဗျာလ်အဘာ"" ယင်းစာပါအကြောင်းရာကိုဖတ်ပနာ အခင်ကြီးစိန်မောင်တယောက် ရင်ထဲမာ သားချေအတွက်ဖြစ်လားခရေ မေတ္တာ ကရုဏာတရားက အနှိုင်းမဟိ။ ယေခါ မြို့ကိုလားဗျာလ် သားပါးသို့ ပြန်စာပီးဖို့ဖေ့သာချေ ဒင်းဂြားချေထည့်ပီးဖို့ပျင်ဗျာလ်ဂါ။ မြို့ကိုရောက်ရေခါ ဖနပ်ချေလည်းတရန်ကကောင်းဝယ်ဗျာလ်ဂါ သားချေအတွက်။ အားလုံးဝယ်လို့လည်းပြီးဗျာလ် သားပါးကိုဇာကနိန်လို့ဇာပိုင်းထည့်ရဖို့မှန်းမသိဖြစ်နိန်ဗျာလ်။ မိန်းခီပြန်ကေကျွန်းသားဇာတခုလည်းမသိဂါ လို့ပြောဂတ်ဖို့။ မမိန်းဗျာလ်။ ကကောင်းတနာနားချေအကြာ စဉ်းစားပလိုက်ရေခါ၊ အခင်ကြီးစိန်မောင်အတွေးတခုပေါ်လာဗျာလ်။ ""ဟုတ်ဗျာလ်..... ရွာမာလူတိပြောနိန်ဂတ်ယင်း သံကြိုးရိုက်ကေ ကကောင်းမြန်ရေလို့၊ ငါလည်းသံကြိုးရိုက်ရဖို့ဗျာလ်။"" ယေခါ စဉ်းစားပြန်ဗျာလ်နောက်တခေါက် ""သံကြိုးဇာပိုင်ရိုက်ရဖို့လဲဂု"" ထိုကြည့်ဒေကြည့်နန့် မီးတိုင်မာတန်းထားရေသံကြိုးတိကိုမြင်ဗျာလ်ဂါ။ စစီးစစပ် ကြည့်လိုက်ရေခါ။ ဟုတ်ဖို့သေချာဗျာလ် ဒေသံကြိုးတိကကောင်းရှည်ရေ ရန်ကုန်တရောက်တန်းနလီးဖို့။ ဒေသံကြိုးကရိုက်ရစွာ သေချာဗျာလ်။ ချက်ချင်းသံကြိုးချေတပင်ကိုကိုင်ပနာ မီးတိုင်ကိုတက်ဗျာလ်ဂါ။ မီးတိုင်ထိပ်ကိုရောက်ရေခါ ပါလာရေ သံကြိုးချေနန့်ဖနပ် ဒင်းဂြား စာ အားလုံးကို ၄/၅ ပတ်သံကြိုး(မီးကြိုး)မာရိုက်ပလိုက်ယင်း။ ပြီးရေခါဆင်းပနာဝယ်စရာဟိစွာကိုဝယ်ဖို့ ဈီးဖက်ကိုထွက်လခယင်း။ ယေခါ မီးလုပ်ရေလူတယောက်က မီးတိုင်ကိုတက်ဗျာလ်မီးလုပ်ရေခါ၊ ယင်းဖနပ် ဖေ့သာတိ အားလုံးကိုယူဗျာလ် သူ့မာပါလာရေဖိနပ်အဆိုးကိုယင်းမာပြန်ချိတ် ပခယင်း။ အခင်ကြီးစိန်မောင် ဈီးကပြန်ဗျာလ်မီးတိုင်ကိုမော် ကြည့်လိုက်ရေခါ။ အံ့သြပနာ……ဟ…….ကကောင်းမြန်စွာမလားဂု ၁နာရီလောက်ဝန်းကျင်မာ ငါပို့လိုက်စွာတိအားလုံးရောက်လခဗျာလ်။
ဒေဖိနပ်အဆိုးတရန်တွိစွာကတော အဘာကျွန်းမာစီးဖို့ သားချေပြန်ထည့်ပီးလိုက်စွာရာဟိဖို့လို့စဉ်းစားဗျာလ် မီးလုပ်ရေလူချီပစ်ခရေဖိနပ် အဆိုးတရန်ကိုယူပနာ ပပျော်ရွှင်ရွှင်နန့်ကျွန်းရွာချေကိုပြန်လခယင်း။

နွားနို့ကောက်ကောက်

ရွာအလယ်ကျင်းတလင်းမာ ထိုင်ပနာ မျက်ကန်း၂ ယောက်စကားပြောနိန်ဂတ်တေ။ မျက်ကန်း၂ ယောက်မာ တယောက်က အမိဝမ်းကထွက်လခပင် ကန်းပါလာပ်စွာ။ နောက်တယောက်ကအရွယ်ရောက်ကြီးပြင်းခါမှာ့ကံမကောင်အကြောင်းမလှရေတွက်လို့ကန်းလခရပါရေ။
ချချင်းချေ ပြောရဖို့ဆိုဂေ ကြီးခါကန်းနန့်ငယ်ကကန်းပါ။
ကြီးခါမှာ့ကန်းရေမျက်ကန်းကပြောလိုက်တေ
"'ဂနိန့်နွားနို့တခွက်သောက်ပလိုက်ခရစွာကကောင်းအရသာဟိရေဂါ""
ယေခါ အချေကပင်ကန်းလာရေအကန်းကပြောလိုက်ရေ ''နွားနို့စွာဇာပိုင်လဲဂု"
ကြီးကန်းက....သီမလားဂု နွားနို့တောင်မသိလား နွားနို့စွာဖြူဖြူပါဂါး။
ငယ်ကန်းက...... ဖြူဖြူစွာဇာပိုင်လဲအကို အကျွန်တော်ကကောင်းမရှင်းဒေ။
ကြီးကန်းက.......ကကောင်းခတ်စွာမလား ..... ဖြူဖြူစွာ ဗျိုင်းပိုင်ပါဂါး။
ငယ်ကန်းက.....ဗျိုင်းစွာဇာပိုင်လဲအကို အကျွန်တော်မသိဂါး။
ယေခါ ကြီးကန်းက လက်ကိုကကောက်ချေလုပ်ပနာထောင်ပြလိုက်ယင်း ဗျိုင်းစွာဒေပိုင်ဒေ လိုင်တန်ယယင်းနန့်။ ယင်းပိုင်ဆိုခါငယ်ကန်းက ကြီးကန်းထောင်ပနာကကောက်ချေလုပ်ထားရေလက်ကို လက်နန့်စမ်းကြည့်ပနာ
အော်...အော်... လို့သဘောက်ရေအမူရာဖြင့်ပြောလိုက်၏။
ကြီးကန်းက...သဘောပေါက်ပါဗျာလ်လားဂု။
ငယ်ကန်းက .......ပေါက်ပါဗျာလ် ပေါက်ပါဗျာလ် နွားနို့စွာ ကောက်ကောက်ကို။

တိုက်ဖို့မလို ဖြစ်ဖို့လို

ရခိုင်သားတိ တိုက်ဖို့ဆိုရေစကားလုံးကိုကောင်းကောင်းသုံးဂတ်စွာကိုတွိရပါရေ။ အမှန်မာတိုက်ဖို့ဆိုရေ စကားလုံးစွာ ရဲရင့်သူရို့လက်သုံးစကားဖြစ်နိန်ရေ အတွက်နန့် စွန့်ပစ်လိုက်လို့မရပါ။ ယေဂေလည်း ပထမဆုံးဖြစ်ဖို့လိုပါရေ။ အင်အားကြီးရန်သူကိုတိုက်ဖို့ အတွက် ခိုင်မာရေအဖွဲ့စီးတခုလိုဖို့ဆိုစွာကို အများသိဂတ်ပါလိမ့်မည်။ ယင်းအတွက်နန့်ခိုင်မာရေအဖွဲ့စီးတခုဖြစ်ဖို့လိုပါရေ။ ခိုင်မာရေအဖွဲ့စီးဖြစ်ဖို့ ခိုင်မာရေ ငွေပမာနလိုအပ်နိန်ပါရေ။ ခိုင်မာရေငွေပမာနအတွက် ခိုင်မာရေစီပွားရေးသျှင်တိဖြစ်ဂတ်ဖို့လိုနိန်ပါရေ။ ခိုင်မာရေငွေပမာနဟိဗျာလ် အဖွဲ့စီးတခုကိုထောင်ရေခါ ယင်းအဖွဲ့စီး၏အသက်ရှည်အောင်စောင့်ရှောက်ဖို့ ပညာသျှင်တိလိုအပ်ပါရေ။ ယင်းလိုအပ်ရေပညာသျှင်တိအတွက် ရခိုင်သား/သမတိပညာတက်ဖြစ်ဖို့လိုပါရေ။ စီးပွားသျှင်ပညာသျှင် ဖြစ်ဖို့ ပထမခြီလှမ်းကိုလျှေက်လှမ်းရပါဖို့။ ယေဗြီးခါမှာ့ ခိုင်းမာရေအဖွဲ့စီးတခုကိုစဉ်းစားဂတ်ရပါဖို့။ ယင်းအဆင့်တိဖြစ်ဗျာလ်ဆိုဂေ တိုက်ပွဲဆိုရေ ခြီလှမ်းစွာမမြင်ချင်ဂေလည်းမြင်လာရလိမ့်မည်။ ဥပမာပြောရဖို့ဆိုဂေ
အင်္ဂလန်အဆင့်မြင့်တန်းဘောလုံးအသင်း ချေဆီး အသင်းကိုကြည်ပါ။ လွန်ခရေ ၅/၆ လှောက်ထိ အောင်မြင်မူကိုရှာမတွိခသိမ်း။ ရုချား သဌီး ရောက်လာရေခါ ဘောလုံးပညာသျှင်တိကိုစုဆောင်းပလိုက်ရေအတွက်နန့် အင်အားကြီးအသင်းတသင်းဖြစ်ပနာ ကမ္ဘာမာနာမည်ကြီးအသင်းတိလည်း ချေဆီး ဆိုရေနာမည်တလုံး၏ အခြောက်လှန့်ခြင်းကိုခံနီရဗျာလ်။ ဓနအင်အား ပညာအင်အားပေါင်းစပ်လိုက်ခါမှာ့ အောင်မြင်မူပန်းတိုင်ကိုလှမ်းမြင်နိုင်လိမ့်မည်။ ဂနိန့်ရခိုင်းသား/သမရို့တိစွာ ပထမခြီလှမ်းမဖြစ်ခင် နောက်တဆင့်ကျော်လှမ်းနီဂတ်ယင်း။ အမှန်မာ ပထမခြီလှမ်းအယင်ဖြစ်ဖို့လိုသည်။

သဘာဝ

အရာရာသည်
မတည်မြဲသောသဘောတရားကြောင့်
ပျက်စီးတက်၏။
ယင်းချင့်သည် သဘာဝတရားပင်ဖြစ်သည်။

မမြဲသောတရားကို
တခါတလီ မြဲ၏လို့မှားထင်မိယင်း
ယင်းအမှားသည်လည်းသဘာဝပင်ဖြစ်၏။

ယေကေလည်း
သဘာဝကို သဘာဝလို့
ဂနိန့်တိုင်နားမလည်းသီး
အသျှင်မင်းတယောက်သံသရာခရီးမှာ
ဆက်ဟိနီပါလိမ့်မည်။
............

သဘာဝတရားက အသျှင်ကို
ကယ်တင်နိုင်ပါဖို့လား
ယင်းပိုင်လည်းမဟုတ်ပြန်ကါး။

သဘာဝကို သဘာဝအတိုင်းမလေ့လာသရွိ
သဘာဝကို ...အသျှင်...မင်းနောက်ကမ္ဘာတသိန်းတိုင်
သဘောပေါက်လီဖို့မဟုတ်
သဘာဝစွာ အမှန်တရား
အမှန်တရားကို သဘောပေါက်ကေ
ဗုဒ္ဓဟောကြားရေ နိဗ္ဗာန်စွာဇာဝီးပါဖို့လဲ။

လွယ်သယောင်ယောင်နန့်ခက်တေ
သဘာဝ...
သဘာဝ

အရက်သမားသတိပီးချက်

ပုလင်းကိုကိုင်
မှိုင်တိုင်တိုင်
ဆိုင်ကိုဝင်တိုင်း
ငါပင်မိုက်တေ
ပြောကက်ယင့်..။

အမူးလွန်ကေ
အမှန်မသိ
သတိဥာဏ်ပင်
ကင်းစင်လို့လား
လမ်းကြားလမ်းဂျောင်
ယောင်တောင်တောင်ထိုးလဲ
လူတိုင်းမြင်ကေ
ဆိုစကားက
လူမိုက်သားလာတ်..။

ပြောဂက်သီးယင့်
မင်းအရက်သမား
သီလလည်းမဟိ
အမျိုးလည်းမသိ
မင်းရို့ဖျက်ကေ
အမျိုးပျက်ဖို့လာတ်..။

သူ့ကိုသူရာ
ငါကပညာဟိဆိုဗျာလ်
ရက္ခိုင်ဆိုနာမည်ကို
စာဖွဲ့ဗျာလ်ဆိုပြ
အမျိုးသီလ
နှစ်ဌာနကို
စောင့်စည်းရဖို့လာတ်..။

ဟဟ......
ပညာဟိ ပညာဟိ
သတိတခုပီးလိုက်မယ်
""သင်ပညာဟိ...
ကိုယ့်အမျိုးကိုယ့်ပြည်
တိုးတက်ရေးတွက်
တခုလည်းမလုပ်ကေ
ငါကအရက်သမားလူဆိုး
တိုင်းပြည်လူမျိုးကို
ဖျက်စီးနီစွာ
သင်အပြစ်မမြင်ကေ"'...။

စက်နှိုးဖိ.

လာဝေဖြတ်ကျော်ဂတ်မယ်
ငါရို့ဖြတ်ရဖို့ပင်လယ်ပြင်က
ကကောင်းကောင်းပင်ကျယ်ရေနန့်
လှိုင်းလီတိ တဟုန်းဟုန်းအော်သံ
ငါ့နားကို ရောက်လာလီခ
ထိတ်လန့်သံတိက
အမှန်ပင်ရင်ထဲကိုဝင်လာရေပိုင်
ဒေပိုင်ခရီးကိုမှ
လာဝေစွန့်စားပနာ
လောင်းချေတစီးနန့်
တတူလှော်ဂတ်မည်လာတ်
မင်းအလီလီပြောဆိုခ..။

ဒေပင်လယ် ကိုဖြတ်ဖို့
ဒေလောင်းနန့်မနိုင်လို့
ဘုတ်ဆင်ဗျာလ် စက်တပ်ဆင်ထားယင်း
လာဝေဖြတ်ကျော်ဂတ်မည်
စက်နှိုးဖိ...။

လားလီ ဝီးလီ ပြန်ကြည့်

နာကြင်မှုဝေဒနာရင်ထဲမှာတပုံနန့်
မရသီးရေလွတ်လပ်မူတိကို
အရယူပလိုက်မည်ကြွေးကြော်သံနန့်တတူ
ချီတပ်လှမ်းနီကတ်စွာ
ခရီးကိုပြန်ကြည့်လိုက်ခါ
နှစ်ပေါင်း ၂၀၀ ကျော်လားခဗျာလ်..။

အောင်မြင်မှုလက်တကမ်းဆိုရေဝေါဟာရကို
ပြန်ပနာဆန်းစစ်ကြည့်ခါ
မှားကါးမမှား အမှန်ရာ
မှားနီစွာက မင်းနန့်ငါ
ပန်းတိုင်ကိုနောက်ခိုင်
လမ်းမှား လျှောက်လှမ်းနီစွာကို.....
ယေစုနန့်ရာ လားလီ ဝီလီ..။

ဇာမှာလဲပန်းတိုင်
်ပြန်ပနာတချက်ချေကြည့်ဂတ်မည်..။

အမုန်းဆုံး

တန်းစီဂတ်ပါ...... ပြောပြီးခါမှ
ကိုယ်ရာဂျောင်မှာ ....... ကုတ်နီရေသူ
ယင်းပိုင်လူကို....... အမုန်းဆုံး..။

ညီညွတ်ကတ်ပါ .......ပြောပြီးခါမှ
သူရာအယင် ....... ရန်စဆင်သူ
ယင်းပိုင်လူကို.......အမုန်းဆုံး.....။

ကိုယ်ကျင့်တရား ......လက်ကိုင်ထားဖို့
စကားဆိုပြော ..... ဟောကြားနီလို့
ကိုယ်ကားအကျင့် ......ဖောက်ဖျက်နီသူ
ယင်းပိုင်လူကို ......အမုန်းဆုံး...။

အမျိူးသားရေး ....... စိတ်မှာတွေးဖို့
ဆွေးနွေပြီးမှ ..... အမျိုးပြဗျာလ်
ရရာယူဆွဲ ...... ကိုယ်ကျိုးစွဲသူ
ယင်းပိုင်လူကို .....အမုန်းဆုံး...။

အမျိုးချစ်စွာ ...... ပြောပြီးခါမှ
ကိုယ့်အမျိုးကိုပစ် .......မျိုးခြားကြိုက်သူ
ယင်းပိုင်လူကို...... အမုန်းဆုံး..။

အမျိုးစောင့်ပါ .......ပြောဆိုပြီးခါမှ
ကိုယ်ရာဘုန်းကြီး ...... ဖြစ်နီရလို့
ငါ့ကိုငါလေ့...... ရင်နာမိရေ
ငါကိုယ်ငါလေ့...... အမုန်းဆုံး..။

ခရီးကြမ်းကလူတစု

ဇွဲမလျောကေ့ဖိ
ငါရို့လျှောက်နီရေခရီးက
ပန်းတိုင်းနန့် မလှမ်းမဝီးဗျာလို့
တချို့ကသတိပီး..။

ငါရို့ဒေခရီးကြမ်းကို
ကျော်ဖြတ်နိုင်လီဖို့ အင်အားမဟိဗျာလို့
ဇွဲကုန်အားပန်နန့် ပြောလူကပြော..။


တညံညံအော်သံတိနန့်
မင်းကမှားရေ ထိုသူမှန်ရေ
ထိုသူမှားရေ ငါကမှန်ရေနန့်
ရန်ဖြစ်နီရေလူတိက တမျိုး..။

အစာရိက္ခာပြတ်ပနာ
အစာရှာထွက်လူတိ
ခရီးတူသူငယ်ချင်းတိကို
စွန့်ခွာရေလူက စွန့်ခွာ...။

အားမသီ မာန်မလျော့ဘဲ
ဇါမှာလဲပန်းတိုင်ဆိုပနာ
အရောက်လှမ်းဖို့
ကြိုးစားရေလူက ကြိုးစား..။


အောင်မြင်မူပန်းတိုင်းနန့်
အဝီးအပါးကို မမြင်လို့
ရရောင်းသက်နီဂတ်တေ
ခရီးကြမ်းကလူတစု...။

အဘာဆောက်ခရေ အိမ်ပြိုဟောင်း

အဘာဆေက်ခရေဒေအိမ်ကြီး...

နွီရာသီမှာ လီဗွီကြောင့်ရာ
အမိုးအကါတိကွာပနာ
ပျက်စီးလားခစွာ လား...။

မိုးဦးကျခါးသီးဖို့ကောင်းရေမုန်းတိုင်းက
တဟုန်းဟုန်အော်ပနာဖြိုဖျက်ခလို့
ပျက်စီးလားခစွာ လား...။

ပျဉ်စီပျဉ်ထောင်တိနန့်
လှပခန့်ငြားခရေ ဒေအိမ်ကြီးကို
ခြတိဖြိုပျက်လို့ ဆွီးပျက်လားခရစွာလား...။

အုပ်မြစ်နောင်းနောင်း အခြီကောင်းနန့်
ကမ္ဘာရွာမှာ အခိုင်ဆုံးလို့ သုံးနုန်းခစွာ
ဇာအတွက်ကြောင့် ပျက်စီးရလီလဲ...။

ဒေအိမ်ကြီးမှာ ရွှီ ငွီ(ငွေ)ကျောက်စိန်
ပြည့်နီခစွာ ဇာလူယူလို့ ပျောက်လီခလဲ။

တစစီပြို အခုစီပျောက်
ကောက်ကိုင်လို့မရ ပျက်လားခရေ
ဒေအိမ်ပြိုဟောင်းကို
သားကြီး သားချေ သားလတ်တိနန့်
သမီးထွီးပါ ဝိုင်းဗျာလ်ကူကေ
တတူညီညီ ပြင်ပျင်ဂတ်မည်
ဒေစွာအဘာဆောက်ခရေ အိမ်ပြိုဟောင်း..။

ဖုန်းရည်းစား(ဇာတ်လမ်း)

ဒေဇာတ်လမ်းစွာဖြစ်ရပ်မှန်ဇာတ်လမ်းပါ။
အဆုံးခန်းမှာ.ရင်တထိထိနန့် နှလုံးရောဂါဟိရေလူတိမဖတ်ပါကေ့ ကြိုးတင်သတိပီးပါရေ။
ဘဝမှာ မတွိချင်ဘဲတွိရ မကြားချင်းဘဲကြားရ ကြားချင်သတင်းမကြားရ တွိချင်လူကိုမတွိရ။
ကိုယ်ချစ်လူနန့်မပေါင်းရ...အမျိုးမျိုးအဖုံဖုံ...နိန့်စဉ်နိန့်တိုင်...တွိဂတ်ရ ကြားဂတ်ရေစွာသည် လောက၏ နိယာမတရားဆိုကေလေ့
ယင်းအထဲမှာမတူညီရေအချက်ချေတိ၏ ဆန်းကြည်မူတခုအသွင်နန့် လူသားတိ၏စိတ်ကို ပျော်ရွင်မူ စိတ်ညစ်မှုဆိုရေသဘာဝတရားတိကို လောကလောကြီးကသူ၏ဇာတ်ခုံထက်မှာ ကဖို့အတွက်ဖန်တီးထားပါရေ။ ယေခါအကျွန်တော်ရို့လောကလူသားတိက လောက၏ စေခိုင်းရာသို့လိုက်ပနာသရုပ်ဆောင်ကပြနီဂတ်ရပါရေ။ အကျွန်တော်ရို့က လောကဇာတ်သမားတိပါ။ လောကကြီးကအကျွန်တော်ရို့၏ဇာတ်ဆရာပါ။...
..တိုင်းပြည်၏ဆင်းရဲမွဲတေမူနန့်အတူတိုင်းတပါးကိုအလုပ်လုပ်ဖို့ ကိုယ့်ရပ်ရွာကိုစွန့်ပနာ ထိုနိုင်ငံ ဒေနိုင်ငံလားဂတ်ရစွာပါမလား။
.ထိုင်းနိုင်ငံမှာဆိုကေ..ရခိုင်လူမျိုးတင်မက..ချင်း..ကချင်...ကရင်..မွန်...သျှမ်း...အစဟိရေ လူမျိုးတိ သမုဒ္ဒရာ ဝမ်းတထွာတွက်
တရားမဝင်နည်းနန့်လာပနာ နီထွက်နီဝင်..အလုပ်လုပ်ဂတ်ရပါရေ။ ယင်းအထဲမှာ အလုပ်လုပ်ရေအတိုင်း ဖေ့သာလစာမရရေလူကအများကြီး။
ပလိပ်မြင်ကေကြောက်နီရစွာကတမျိုး.. စိတ်ဖိစီးမူတိကမကန်..ယင်းစိတ်ဖိစီးမူဒဏ်တိပြယ်ပျောက်ဖို့တွက်။ နည်းမျိုးစုံနန့်ကြိုးစားဂတ်ရေခါ သက်သာမူအရဆုံးတခုက ထိုထိုဒေဒေလားဖို့အခွင့်မသာရေတွက်နန့် ဖုန်းနန့် ရည်းစားစကားပြောဂတ်ပါရေ။ အလုပ်ပြီးဗျာလ်ဆိုကေ ဖုန်းချေတလုံးကိုကိုင်ပနာ ရည်းစားစကားပြောဂတ်တေ။ ဖုန်းထဲမှာပြောယင်းနန့် သံယောဇဉ်တိဖြစ်ပနာ ရာသက်ပန် အိမ်ထောင်သည်ဘဝကိုထူထောင်လားကတ်တေလူတိလည်းအများကြီး..။
..တနိန့်မှာ..
အရုပ်ရည်လှလှမျက်နှာဝိုင်းဝိုင်းနန့် အသက်၂၂နှစ်အရွယ်ခင်ပြုံးဆိုရေ မမချေတယောက်ပါးကို ဖုန်းတလုံးဝင်လာပါရေ...လက်ခံပနာ
အသူပါလဲလို့မီးလိုက်ပါရေ။ ယေခါ အကျွန်တော်ပါရာလို့ ပြောပါရေ။ အကျွန်တော်အသူပါလဲလိုမီးလိုက်ရေ...။
ထိုပြောဒေပြောနန့် ..
.ယင်းလူ၏ပြောဆိုပုံက ခင်ပြုံးကိုထိုတချိန်ကသိဖူးရေမိတ်ဆွေးတယောက်လို့ထင်ရလောက်အောင် သူမအကြောင်းကိုသိနီပါရေ..အမှန်သိစွာတောမဟုတ် ..သူမနန့်အလုပ်တတူလုပ်ဖူးရေယျောက်ကျားချေတယောက်ပါးက သူမ၏အကြောင်းတိကိုသိထားစွာရာ။ ခင်ပြုံးက.......အစ်ကိုနာမည်ဇာခေါ်ပါလဲ.. ကြီးဗျာလား..ညီမထက်ကြီးဖို့ထင်ပါရေ.။
အကျွန်တော်နာမည်... ဇော်ဇော်..ပါ။ အသက်က ၂၆ နှစ်ပါ။ ၁၅ မိနိစ် ဝန်းကျင်လောက်ပြောလို့အပြီး ဟုတ်ပါဗျာလ်အစ်ကိုဖုန်းချလိုက်မယ်။မအားလို့ပါ။ ဇော်ဇော်က...ယင်းပိုင်ဆိုကေလေ့ကောင်းယင်း။ နောက်မှတွိဂတ်မယ်....ဘိုင်း.ဘိုင်...
စကားဆုံးလို့ ဖုန်းချလိုက်ဗျာလ် ခင်ပြုံးစိတ်ထဲမှာ သူပြောလားခရေစကားသံတိ ဆွေးဆောင်မှုကောင်းရေစကားလုံးတိက သူမရင်ထဲကအဝီကိုထွက်မလားသီးစွာကိုတော သူမကိုယ်သူ သိနီပါရေ။
....နောက်ရက်တိမှာလည်းနိန့်စဉ်နိန်တိုင်း ဖုန်းခေါ်ပါရေ...
နိန့်တိုင်းပြောယင်းနန့် တယောက်ကိုတယောက်ဆွဲဆောင်မှုနန့်အတူ ချစ်ရေးချစ်ရာတိပြောပနာ သံယောဇဉ်တိဖြစ်ချစ်ကြိုက်လားကတ်တေ။
တနိန့်မှာ တယောက်နန့်တယောက်ရာသက်ပန်ပေါင်းသင့်ဖို့ဆုံးဖြတ်ဂတ်တေ။ ဇော်ဇော်၏အရုပ်ကိုခင်ပြုံးက မမြင်ဖူးသီး။ ဖုန်းထဲမှာသူ၏ပြောပြချက်အတိုင်း ခန့်ခန့်ညားညားလူချောတယောက်ဖြစ်လိမ့်မည်လို့ ခင်ပြုံးသဘောပေါက်ထား၏။
..ဇော်ဇော်ကချိန်းလိုက်တေ...နောက်တရက်..ညစာဖက် ၄ ချက်တီးလောက်ကေ...နင်ပါလာတ်..ငါ..အနုဆာဝါရီကျောက်တိုင်နန့်မနီမဝီးတနိန်ရာမှာ တခါတည်းကါးငှားဗျာလ်စောင့်နီမယ်။
အနုဆာဝါရီကျောက်တိုင်စွာ လူ..၁၁..သန်းလှောက်နီထိုင်ရေဘန်ကောက်မြို့ကြီး၏အချက်ချာကျရေနီရာဖြစ်ပြီး လားလူလာလူကကောင်းထူထပ်ရေနီရာတခုပါ။ ..သူမလည်းလားဖို့ ဆုံးဖြတ်လိုက်တေ..သူမအနားမှာတတူနီရေသူငယ်ချင်း..နီနီ..ကိုတိုင်ပင်ပါရေ။ သူမ၏သူငယ်ချင်းက သူငယ်ချင်ဖြစ်ပါဖို့လားတခါလည်းမမြင်ဖူးဘဲလို့ပြောလိုက်၏ ။
ခင်ပြုံးက..နီနီ..ငါတောစွန့်စာဖို့ဗျာလ် ဆုံးဖြတ်ပြီးယာ။.
...သူမနီစွာက ဆိုကေ.အနုဆာဝါရီသို့.ကါးနန်..၁..နာရီလှောက်လားရပါရေ။...
ခင်ပြုံးတယောက်..ကိုယ်ချစ်ရေ အိမ်ထောင်ဘက်ယောက်ကျားတယောက်ကိုတွိဖို့ရင်တထိထိ ခုန်ပါရေ။ ဝမ်းသာစွာကတမျိုး..စဉ်းစားစွာကတပုံနန့် အိပ်လို့မပျော်ဖြစ်နီရေ။ ......နောက်နိမှာ ၃ နာရီလှောက်မှာရီချိုးပြီးအလှဆင်ပါရေ။
သေသေချာချာ မှန်ကိုအခေါက်ခေါက်ခါခါ ကြည့်ပါရေ။ ၄နာရီလည်းတီးဖို့ယာ။ ဘသားကြီးကလည်းအခေါက်ခေါက်ခါဖုန်းဆက်တေ။
၎နာရီတီးခါနီမှာ... လိုက်ပို့ဖို့သူမအကူညီတောင်းထားရေနီနီ နန့် အတူ သူမနီရေအိမ်ခန့်ကနီလို့ဆင်းကတ်တေ။
taxi တစီးငှါးပနာ ချိန်းထားရာသို့လားဂတ်ပါရေ။ သူမကကောင်းရင်ခုန်ပါရေ။ကိုယ်ချစ်ရေလူနန့်တွိရဖို့လို့
ဝမ်းသာစွာကတမျိုး သူမ၏ဘဝကိုအခါမှမမြင်ဖူးရေလူကို လားအပ်ရဖို့ဆိုရေအတွေးချေလည်းတမျိုး ။
ဇါဘဲဖြစ်ဖြစ် ဝမ်းသာနီစွာတောအမှန်ရာ။ ယေခါတရီခန့်လှောက်မောင်းလာခါ ချိန်းထားရေနီရာနားကိုရောက်ပါရေ။
သူရို့ခင်ပြုံးနန့် နီနီ၂ယောက် taxi ထက်ကဆင်းကတ်တေ။ ချိန်းထားရေနီရာကတော လူသူစည်ကားရေအနုဆါဝါရီနနု့်ပါးပါရေ။ ယင်းနီရာကတောလူတိယင်းလောက်အလားလာမဟိရေလမ်းကြားတခုပါ။ taxi ကဆင်းလို့အပြီးမှာ ခင်ပြုံးက ဖုန်းဆက်လိုက်ခါ သူမနန့်မနီးမဝီးကလူတယောက်ကိုင်ပါရေ အနားမှာလည်းကါးတစီးဆိပ်ထားပါရေ သူငှါးလာရေကားနန့်တူပါရေ။ သူဖုန်းကိုင်စွာနန့် ခင်ပြုံးပါးစက...ဟ...လို့ဖြစ်လားရေ.။
ခင်ပြုံးဖုန်းကိုပိုက်ဗျာလ်အိပ်ထဲမှာအသာချေပြန်ထည့်ထားလိုက်၏။ ခင်ပြုံးတချက်ကြည့်လိုက်ခါ .သီဗျာအလိမ်ခံရဗျာလ်နန့်တူရေ ....ဖုန်းထဲမှာက ၂၆..နှစ်...ဒေလူကအသက်က ၄၀ ကျော်လှောက်ဟိဗျာ
...ဖုန်းထဲမှာခါ အရုပ်ကောင်းကောင်းအလှပ...ဒေလူကမျက်နှာခွက်မှာကျောက်ပေါက်အရာတိဆိုလည်းမကန်...ဒေလူတောသေချာဗျာလ်..
ဒေလူနန့်ရာဆိုကေ သီဗျာလ် ဘဝနစ်ဗျာလ်...။ ဇာပိုင်လုပ်ဖို့လဲဂု...။
သူမနန့်အတူလိုက်လာရေနီနီကို...အသာချေပြောလိုက်၏ ...ဟေ့..ဟေ့..ကိုယ့်စကားမပြောကေ့နန့်...ထိုင်းစကါးပြောဂတ်မယ်။
ဆိုပနာလက်ကုတ်လိုက်တေ။ ..ယေခါ ထိုလူကြီးစွာ သူမအနားကိုလာပနာ ဟုတ်လားမသိ...အရိပ်အကဲလာကြည့်ရေ။ သူမရို့၂ ယောက်စကားမပြောဘဲနီရေတွက်နန့် နုတ်မဆက်ဝန့်...ဟိုကြည့်ဒေကြည့်လုပ်နီရေ။ ရင်ခုန်စွာတော......ဒ.ဒုံး..ဒ.ဒုံး....သူကခင်ပြုံးကိုဖုန်ပြန်ခေါ်ကေလည်းပိတ်ထားရေတွက်နန့်မဝင်။
taxi တစီးလာရေခါ ကဗျာကယာ လက်ကါပနာပြလိုက်တေ..။ taxi ရပ်စွာနန့် တပြိုင်နက် တက်ဗျာလ်ပြန်ထွက်ပြီးရလီရေ။
taxi ထက်ရောက်မှအသက်ပြင်းပြင်းတချက်ချလိုက်သည်။

လီတိုက်ပွဲ

နာကြင်မှုဝေဒနာတိ ရင်မှာပြည့်ဗျာလ်
ချန်ပနာထွက်လာလီခ ဒေါသမီးတိက
တဟုန်းဟုန်းတောက်လောင်..။

ကိုယ့်အမျိုးကိုယ်ပြည်တွက်
အသက်ကိုပင်စွန့်ပလိုက်ဖို့ ကြွေးကြော်သံတိက
ကမ္ဘာမြီတခုလုံး သမုဒ္ဒရာဖြစ်စီအောင်ရွာမည့်မိုး...။

ဗုံးပေါက်သံတညံညံနန့်
ရိုးမတဖက်မှာ တိုက်ပွဲသံလာဗျာလ်လား
နားထောင်ကြည့်လိုက်ခါ
လီတိုက်ပွဲရာ..။

ဒဏ်ရာနန့် နှလုံးသား

မင်းလုပ်သရွိ ....မျက်စိဇုံမှိတ်
မသိဘဲထောက်ခံ...မင်စံစားဖို့
ငါရင်ထဲမှာ....အဖြည့်ခံနှလုံးသားမဟိ..။

မင်းကိုအားကိုးခ .....ငါ့ဘဝမှာ
ရလာဒ်ကိုကြည့်ခါ.....အဖြေရလာစွာက
သုညဒီဂရီမှာ....အနုတ်လာတပ်နီယင့်..။

မင်းပါးစက.....အပြောလှလှ
ယုံစားခစွာ......ငါမှာအမှား
တခါမဟုတ်....သုံးခါလုပ်ဗျာလ်
ယင်းစွာမင်းမှတ်မိလား?

ဒေမှာငါပြန်ပြောပြမည်..
ပထမ....
မင်းကိုအားကိုးလို့
၁၇၈၄ ဒီဇင်ဘာ ၂၈ ရက်မှာ
ငါမှာထီးနန်းပျောက်လီခရေ..။

ဒုတိယ....
၁၉၄၆ ခုနှစ်မှာ
ဂျပန်နန့်အိင်္ဂလိပ်ကို
လူယုတ်မာဆိုပနာလက်ညိုးထိုးပြ
မင်းနန့်ငါညီအကိုပိုင်နီဂတ်ဖို့လာတ်
အဆုံးမှာမင်းက ငါ့ကိုကျွန်လုပ်လီခရေ..။

လာပြန်ယာတခါ..
တတိယ...
မင်းကဒီမိုဂရေဆီစနစ်ကိုထောင်ဂတ်မည်
အေးတူညီမျှဖြစ်စီရဖို့လာတ်
သျှာမှာသကါလူးပြောရေပိုင်
စကါးချိုလီဘက်စီ ငါမယုံဝန့်ဗျာလ် ..။
ဒဏ်ရာရနှလုံးသားနန့်ငါ
နောက်တခါကျွန်မဖြစ်ချင်ဗျာလ်..။

sport ချစ်သူ၏ခံစားချက်

ဇာ sport မဆိုကြိုက်နှစ်သက်ပါရေ..
အထူးအားဖြင့် ဘောလုံးပွဲ နန့် ဘောင်ဆိန်ပါ..ဇာ sport မျိုးမဆို tv ကလာဗျာလ်ဆိုကေစောင့်ကြည့်ရေအလေ့ထချေတခုဟိပါရေ..။
ဇာ sport မဆိုလူတိုင်းလူတိုင်း အနိုင်သျှုံး ချေတခု၏ရလာဒ်ကို စောင့်ကြည့်နီင်္ဂတ်စွာပါဗျာလ်. ကိုယ်လည်းယင်းအတိုင်းပါယာ။
ယေကေလေ့ တနိုင်ငံနန့်တနိုင်ငံ ပြိုင်ပွဲတခုယှိုင်ပြိုင်ရေခါ..ကြည့်တိုင်းကြည့်တိုင်းမှာ..အမြဲပိုင်ဝမ်းနည်းမိပါရေ။
ပြီုင်ပွဲမစခင်နိုင်ငံတော်သာခြင်းကိုဆိုရေခါပါ...
သူများတိကမ္ဘာအလည်မှာ ဆင်းရဲချမ်းသာစွာပဓါနမဟုတ် ကိုယ်နိုင်ငံတော်သာခြင်းကိုဝင့်ဝင့်ကြွာကြွားဆိုနိုင်မလားဂု ..
ငါရို့တိမှာ ဇာမှာလဲကမ္ဘာအလည်မှာ ဆိုပြဖို့နိုင်ငံတော်သာခြင်းလို့ စိတ်ထဲမှာတွေးဗျာလ် ကကောင်းခံစားရပါရေ။
၂၀၀၄ ခုနှစ် ပေါ်တူဂီမှာကျင်းပရေယူရိုဘောလုံးပွဲမှာ ဂရိ အသင်းဗိုစွဲလာခပါရေ. . ယေခါ ဂရိလူမျိုးတိစွာအောင်ပွဲနန့်အတူ ပျော်အားကြီးလို့ပီတိမျက်ရည်တိကျဂတ်ပါရေ။
ကိုယ်ကတောင်မနည်းကို မျက်ရည်မကျဖို့ထိန်းထားရပါရေ ..ဝမ်းသာလို့မဟုတ်ပါ..ဇာမှာလဲငါရို့လူမျိုးတိမှာဒေပိုင်နိုင်ငံကိုယ်စားပြုအောင်ပွဲဆိုပနာ စိတ်မှာတွေးမိခလို့ပါ။
..sport ချစ်သူတယောက်၏ ခံစားချက်ကို တင်ပြစွာပါရာ..။

ခရီးလွန် အပြန်ခက်

အဥထဲမှာ
သာယာစွာပိုင် ထင်မှတ်ခစွာ
အသိုက်ထဲရောက်လာခါမှ
အဥထက်သာယာစွာကို တွိ့လီခရေ။

အသိုက်မှာ
အယာဆုံးလို့ထင်မှတ်ခစွာ
ပျှောပနာသစ်ပင်ကြီးကို ကြည့်လိုက်ခါမှ
အသိုက်ထက်သာယာစွာကို တွိ့လီခရေ။

ကိုယ်နီရေသစ်ပင်ရာ
အသာယာဆုံးလို့ ထင်မှတ်ခစွာ
အပင်ဖျားကိုတက်ပနာ အပြင်ပကိုကြည့်ခါမှ။
ငါနီရေသစ်ပင်ကြီးထက်သာယာစွာကို တွိ့လီခရေ။

ဒေပတ်ဝန်းကျင်ရာ
အသာယာဆုံးလို့ ထင်ခလီစွာ
အတောင်စုံလို့ ပျံသန်းကြည့်ခါမှ
ငါနီရေပတ်ဝန်းကျင်ထက်သာယာစွာကိုတွိ့လီခရေ။

ထိုထက်တဆင့်
သာယာမူနောက်ကို လိုက်ပနာ
ခရီးဝီးကို ဇာဟိလဲလားကြည့်ခစွာမှာ
ခရီးလွန် အပြန်ခက်တေငှက်ချေတကောင်ဖြစ်နီဗျာလ်။

စီးပွားရေးကင်ဆာ အဖြေရှာ

သွီးကင်ဆာရောဂါရထားရေလူတယောက်မှာ ဟိရေသွီးတင်မက အသစ်သွင်းရေသွီးပင်မကျန် အားလုံးကိုရောဂါစုပ်ယူလားခတေလို့ကြားဖူးရေ..ယေခါ ကနိန့် ရခိုင်ပြည်၏ မွဲပြာနီရေ အကြောင်းတရားတိကို လိုက်ရှာကြည့်လိုက်ခါ
သွီးကင်ဆာရထားရေလူပိုင်....
၁.....ရခိုင်သူရခိုင်သားရို့ပိုင်ဆိုင်ရေ သဘာဝသယံဇာတိကိုနည်းမျိုးစုံနန့် တလုံးတဖေ့ချေမချန်ဘဲ အရစုပ်ယူနီဂတ်ပါရေ။
ဒေအချက်စွာ မိမိခန္ဓာထဲကသဘာဝသွီးကိုကင်ဆာရောဂါစုပ်ယူလားခရေစွာနန့်တူပါရေ။
၂.. ..မြိုးလူကြီးနယ်လူကြီးဆိုပါနာ အရှေးပြည်သားယင်းသူရို့ ဒါးမြတိကိုရခိုင်ပြည့်အနံ့မှာဝန်ထမ်းခန့်ထားပါရေ...ယေခါ ယင်းဒါးမြမျိုးနွယ်တိက ရခိုင်သူရခိုင်သားတိလုပ်စားစရာမဟိရေကြားက ချွဲနန့်ရင်းဗျာလ် ရှာထားရေပစ္စည်းဥစ္စာတိကို နည်းမျိုးစုံကိုအကြောင်းပြပနာ ခြောက်လိုက်တောင်းလိုက်နန့်တမျိုး သွီးစုပ်နီရေ..ဒေစွာက မိမိကိုယ်ပိုင်သွီးကုန်လားခလို့အပြင်က အစားထိုးရေသွီးကိုပါစုပ်ယူလားရေစွာနန့်တူရေ။
၃.....အပြင်ကသာမန်မျက်လုံးနန့်ကြည့်လို့မမြင်ရကေလေ့ လူသားတိအသက်ရှင်နိန်ထိုင်ရေ အဓိကသွီးကြွားမှာ မွှီနှေက်နောင့်ချက်နီရေခါ သွီးမဟိ သွီးကုန်ခမ်းလားခါ လူသားတိအသက်မရှင်နိုင်အောင်လုပ်နီရေဒေရောဂါ။...ဒေအချက်က ငါရို့တိကို သာမန်ပြည်သူတိမမြင်နိုင်အောင်စကါးချိုချိုသာသာနန့်တမျိုး ခြောက်လန့်ဗျာလ်တမျိုး နည်းမျိုးစုံနန့် ရခိုင်ပြည်၏အဓိက အသက်သွီးကြွားစီးပွားရေးလမ်းကြောင်းမှာ စီးပွားရေးသွီးရည်တိကို အားလုံးကိုစုပ်ယူနီစွာနန့်တူပါရေ။
၎...ဒေရောဂါဆိုးကိုကုဖို့ ဒေါက်တာဆရာဝန်ကောင်းကောင်းလိုအပ်ပါရေ။ ဒေအချက်က ဇာနန့်တူလဲဆိုကေ ရခိုင်ပညာတက်တိ ကိုယ်ထမင်းတလုပ်ဝရုံနန့်မကြည်နပ်နီဘဲ ရခိုင်ပြည်၏ ကင်ဆာရောဂါကုနည်းလို့ခေါ်ရေ တော်လှန်ရေးလုပ်ငန်းမှာ ဒေါက်တာတယောက်အဖြစ်ပူးပေါင်းပါဝင်သင့်ပါရေ။

ဇာကြောင့်လဲ

တဗြစ်ဗြစ်မြည်နီရေ.....ပါးစ
တတွက်တွက်ဆိုနီရေ..... စကား
တတိတ်တိတ်တွေးနီရေ .....အကြံ
တရွိရွိလျောက်နီရေ ..........လမ်း
လမ်းမမှန်လို့ဝီးနီရေ .........ခရီး
အဆက်မပြတ်ကြိုးစားနီရေ.... လုံးလ
အကောင်းဆုံးလို့ကျင့်သုံးနီရေ.....မူ
သဘောမတိုက်ဆိုင်လို့ဖြစ်နီရေ......ရန်


....အကြောင်းခံ ..ပြန်ကြည့်လိုက်ခါ
မျိုးချစ်စိတ်တခုကြောင့်ရာ။

အမျိုးနာရေ ရခိုင်နိုင်ငံရေးသမား၂မျိုး

နိုင်ငံရေးသမိုင်းတလျှောက်ကိုကြည့်လိုက်ရေခါ..
ငါရို့တိမှာ အမြှောက်ခံနိုင်ငံရေးသမားနန့် အခြောက်ခံနိုင်ငံရေးသမားဆိုပြီးကေ ၂မျိုးရတွိ့ပါရေ ကောက်ချက်ချကေ ၂မျိုးလုံးကိုအလိမ်ခံ နိုင်ငံရေးသမားလို့ပေါင်းဗျာလ်ဆိုနိုင်ပါရေ။


၁..အမြှောက်ခံနိုင်ငံရေးသမားဆိုစွာဆရာတော်ဦးဥတ္တမ ရို့ပိုင်ပုဂ္ဂိုလ်တိကိုခေါ်ပါရေ။ ယင်းသူရို့မြန်မာတိကသူရဲကောင်းကြီးဆိုပနာမြှောက်ပနာပေါင်းခပါရေ.။ ဂနိခါမှာ ထုထားရေအရုပ်ကိုချောက်ထဲကိုဝဲပလိုက်ယာ။ democracy အုပ်စုမြန်မာတိကဦးဥတ္တမရို့ ဦးဝစာရရို့ဆိုပနာတဂိုဏ်းတည်းထားပနာသုံးနုန်းစွာကိုတွိ့ရပါရေ။ သမိုင်းကို သမိုင်းအတိုင်းတန်ဖို့ထားဂေ ဆရာတော်ဦးဥတ္တမ၏သမိုင်းစွာ ဦးဝိစာရသမိုင်းထက်သာလွန်ကြီးကျယ်ပြီးကေ လုံးဝနှိုင်းလို့မရပါ။ သူ(ဆရာတော်ဦးဥတ္တမ)လည်းထင်ခလီပါဖို့ ငါဒေပိုင်ပင်ပန်းခံလုပ်ပီးခစွာသည် ငါရို့မျိုးတွက်လို့။ သူသီလားပြီးနောက်ပိုင်းမှာကါ သူ့လူမျိုးတွက်မဖြစ်လာ။ သူကိုယ်တိုင် ဒေအဖြစ်ပျက်တိကိုမြင်ခလီဖို့ဆိုကေ ငါအလိမ်ခံနိုင်ငံရေးသမားတယောက်ရာမလားလို့သိလီဖို့။ ယင်းပိုင်မမြင်လီရေတွက်နန့်သူပီးဆက်လားသမျှကို စိတ်မှာကြည်နပ်လီဖို့ထင်ရေ။

၂...နောက်တမျိုးကအခြောက်ခံနိုင်ငံရေးသမားပါ။ အခြောက်ခံနိုင်ငံရေးသမားတိက ငါရို့အုပ်စုနည်းရေ လူဦးရေနည်းရေ မဟာမြန်မာတိနန့်မပေါင်းလို့မဖြစ်ဆိုရေအတွေးတိနန့် သိမ်ငယ်ရေစိတ်တိနန့် အခြောက်ခံနိုင်ငံရေးသမားပါ။ အခြောက်ခံနိုင်ငံရေးသမားကကေါ နောက်လိုက်ဖို့စွာမှာ သေချာစွာရာ။ ဇာဖြစ်လို့လဲဆိုကေကြောက်လို့ပါ။ နိုင်ငံရေးသမိုင်းထဲမှာကြားအားလုံးသိဂတ်တေ ပင်လုံစာချုပ်ကိုကြည့်ရေခါ ယင်းစာချုပ်အတိုင်းဆိုကေ ရခိုင်သားငါးပါးမှောက်တေ ဂနိန့်လည်းရခိုင်သားတိပစထဲမှာ တန်းတနီစွာကိုကြားရရေ။ အမှန်မှာ ရခိုင်သားတိပါးစမှာ ပင်လုံစာချုပ်ကိုထည့်လို့တောင်ပြောဖို့မကောင်း။

သမိုင်းထဲမှာရာ အခြောက်ခံခလားကြည့်ရေခါ ဂနိန့်လည်းအခြောက်ခံနီရသီးရေ အလိမ်ခံနီရသီးရေ။ အသူရို့လဲမီးကေ........အောင်ဆန်းစုကြည်နောက်က်လိုက်ကိုတွိ့လိမ့်မည်။

အမှန်မှာ ကိုယ့်အချင်းချင်းလက်တွဲ့ပနာ စည်းစည်းလုံးလုံးနန့် သတ္တိဟိဟိနန့်ချီတက်ရဖို့စွာ။
မြောက်လို့မမြောက်ကေ့ ခြောက်လို့မကြောက်ကေ့
ရခိုင်အချင်းချင်းရာလက်တွဲ ချီတက်ကတ်မည်။

ချော်သီချော်သက်

ရသိတောင်ကသူငယ်ချင်းတိကောင်းဟိပါရေ သူရို့တိပြောပြရေအဖြစ်ပျက်ချေတခု၊
ရသိတောင်မြို့နယ်မယူကမ်းကရခိုင်ကိုယ်တော်ချေတပါးမြန်မာပြည်ကို ကြွလာစ မင်းလှမြို့နယ်မှာသတင်ူးသုံးနီထိုင်ဖို့တွက် မင်းလှမြို့မကျောင်းမှာတည်းခိုနီရေလာတ် ယေခါမြန်မာတကါမတိလာပနာအချိုရည်လာလှူပါရေ အချိုးရည်ပလင်းကိုအဖုန်းဖွင့်လို့ ကိုယ်တော်ကိုလာကပ်ပါရေ၊ ထိုပြောဒေပြော မြန်မာစကါးမပီးကလာပီကလာနန့်၊

တကါမကလက်ဦးချီပနာ သူလှူထားရေအချိုရည်ကိုသောက်ဖို့အတွက် ဖုန်းပေးပါဘုယား လို့ပြောလိုက်တေ..ယေခါရခိုင်ကရောက်စကိုယ်တော်ချေသဘောပေါက်လွဲပနာ..
သူ့အနားမှာဟိရေ..အချိုရည်ပလင်း၏အဖုန်းကိုကောက်ပြီး...ယော..ဆိုပနာတကါမကိုပီးလိုက်တေလာတ်
..အနားမှာဟိသူ့ငယ်ချင်းမြန်မာပြည်မာအနီကြာကိုယ်တော်က တတိုးချေလက်ကုတ်ပနာ ..အဝေ...ဖုန်းပေးဆိုစွာ အဖုန်းကိုတောင်းစွာမဟုတ်.. မင်းကိုသောက်လို့ပြောစွာယေ ...ယေခါမှာ အချိုရည်ပလင်းကိုယူပနာယောက်လိုက်ပါရေ။

အရာလည်းရခိုင်ကိုတော်တပါး
မြန်မာတကါမက ယင်းပိုင်ဖုန်းပေးပါဘုယားလို့ပြောစွာကို စားခါနီးမှာ သဘောပေါက်လွဲပနာ အနားဟိရေ ဗန်းခံကိုယူပနာဆွမ်း၊ဟင်းတိနန့်ရှေးမှာတည်းထားရေစားပွဲကိုဖုံးပလိုက်လို့ တကါမ ကြောင်သီကြောင်သက်ဖြစ်နလီခရေ၊

ငါဘုန်းကြီးဝေ

ရွာတရာက မြို့ကိုဈီးပြုဖို့ဘုတ်နန့်လားဂတ်တေ ဆရာတော်လေ့တပါး အလိုကိစ္စတခုကြောင့်ယင်းဘုတ်မှာပါလာရေ။
ယေခါ ကံမကောင်းအကြောင်းမလှပုံက လမ်းတပိုင်းမှာ ဘုတ်မှောက်ဗျာလ် ဘုတ်မြုတ်လားခရေတွက်နန့်
ရုံးရင်းဆံခကတ် ကူးလူကကူး အော်လူကအော် သရပေါင်းသက်ပနာ ဖြစ်နီရေခါ တနားချေနီကေ တခြားတဖက်ကနောက်ဘုတ်တစီးမောင်းလာရေ...ယေခါ...ယင်းဘုတ်ကလူတိ ရီမြုတ်သားတိကို ကယ်ဆယ်ရေးဝင်ပါရေ။
ရီထဲမှာမြင်သရွိလူကိုဘုတ်ထက်သို့ဆွဲတင်ပါရေ။ ယေခါဘုတ်ထက်လူတယောက်က.... ထိုမှာဂေါင်းတုံးတုံးနန့်တယောက်....ဆွဲတင်ဝေ..
ဆွဲတင်....၊ ယင်းပိုင်ဆိုခါ ..ဝိုင်းပနာဆွဲတင်ဂတ်တေ...တက်ဝေတက်..တက်ဝေတက်..ဆိုပနာ...လက်ကိုင်ပနာဆွဲတင်ဂတ်တေ...ဘုတ်နံကိုခြီတင်ပလိုက်ဝေလို့ပြောခါ။ ဂေါင်းတုံးတုံးနန့်ရီမြုတ်သားကပြောလိုက်တေ...တကါ..ငါဘုန်းကြီး...လို့ပြောလိုက်တေ...။ (ရီကူးခါ..သင်းပိုင်သင်ကန်းတိကျွတ်လားခလို့ ခါးမှာအဝတ်မပါရေတွက်နန့် ဘုန်းကြီးလားလူလားခန့်မှန်းမရဖြစ်လခပါရေ)
မသိလို့ပါဘုရား...ကြွပါကြွပါ...

ထွီး

ရသမျှဓနဥစ္စာ ....သီခါပါဖို့ပိုင်
အိပ်မှာချည်းထည့်.....မျိုးကိုမကြည့်ရေလူ..။

တတ်လိုက်တေပညာ.....ကိုယ်ပြည်ရွာမှာ
ပညာမျိုးစိ............မချဟိရေလူ..။


လုပ်လိုက်တေနိုင်ငံရေး ......စိစိတွေးကေ
ကိုယ့်မျိုးဘက်မနိန်(နီ).....ပေါက်ဆိန်ရိုးဖြစ်နီရေလူ..။


ပြောလိုက်တေကိုယ့်အမျိုးသား......ဟုတ်လားကြည့်ခါ
အလုပ်မပါ......အာဖွာနီရေလူ..။

ပီးလိုက်တေအကြံ.......စေတနာမှန်လားကြည့်ခါ
အငြင်းသန်ပနာ.........စိတ်ဓါတ်မမှန်ရေလူ..။

ကြိုက်လိုက်တေသဇင်.........နမ်းဖို့ပျင်ခါ
စံပါယ်ပန်းကိုရာ...........ကောက်ကိုင်ရေလူ..။

လုပ်နီရေကျောင်းဆရာ.... ပညာရပ်ကိုကြည့်ခါ
ပထွီးယုတ်ကိုရာ........အဖခေါ်ခိုင်းနီရေလူ..။

ဒေပိုင်အတွေး....... ဒေပိုင်အကြံ
မမှန်စိတ်ထားနန့် ....မင်းပိုင်အကောင်
ထိုက်တန်ရေအသုံး ....စကါးလုံးကို
ရွီးထုတ်လိုက်ခါ......"ထွီး" တလုံးရာတွိကါ..။